Act 5 | NAS | STEP | Teka narung naning miring Ananaiasi teni ninka baꞌaang Sapaira, teringe kansiꞌkoo niiꞌnooꞌ baavevuretuꞌ.

Acts 5

Ananaiasi-daring Sapaira Daang Daangamparekotaaꞌ Booꞌparetuꞌnaꞌ

1 Teka narung naning miring Ananaiasi teni ninka baꞌaang Sapaira, teringe kansiꞌkoo niiꞌnooꞌ baavevuretuꞌ. 2 Eeꞌnoko Ananaiasi, baꞌaange noruꞌui otoko, niiꞌning pinkaꞌura eeꞌnoko niiꞌning kara okovuri nkanuka-anko tavoꞌuuꞌ ookutunung mooꞌ tampuma. 3 Teka Piitai aaꞌpuuꞌ, “Ananaiasi, aming-koo daꞌ Sietaniꞌke domang maantoꞌkoo tauraꞌdaring Tanuaang Meekung tosieeꞌnaang mooniꞌkoo niiꞌning pinkaꞌei kansiꞌ baaveveieeng-koong? 4 Tenang mmeꞌ baaveveaꞌ tevoraꞌ tee daꞌ narung okorui otokoꞌnung. Eeꞌnoko baaveveieenooꞌketa tee mooniꞌ tee dakaang, daka piaropeuꞌnaꞌ nkovepeuꞌ. Naninge eturuarupeuꞌ aꞌ tavoꞌkoo. Eeꞌnoko arekeeꞌkoo dakaang domange teeꞌ matauei? Aiꞌ dake tee naning tosieaꞌ, teka Kumponing tosieing.” 5 Tenang Ananaiasie teing kara taaravura tee teꞌ doonko booꞌ duaꞌaruꞌnung. Eeꞌnoko teing nantoong taaravauꞌning aaꞌnaꞌ avoreauꞌ. 6 Teketa nemaaꞌ daaꞌarira mono nopaꞌaara nkavai berora dakoꞌauꞌ.

7 Damaꞌke beenaumo aua-pinaꞌ tankinuko baꞌaang teꞌ tavoꞌkuuꞌ noruꞌuaꞌ kapooꞌ nkoaruꞌnung. 8 Eeꞌnoko Piitai aaꞌpuuꞌ teni, “Naumeai, deeꞌke ee masikaꞌ kansiꞌ aing-koo mooniꞌ anke otoining-koo makosi baaveveresieeng?” Eeꞌnoko tenie aaꞌpuuꞌ, “Eeꞌ, teing-koo makosi.” 9 Teka Piitai aaꞌpuuꞌ teni, “Deeꞌke arekeeꞌkoo nariꞌ mataueresing Tanuaang Meekung Ovoring bakaang paara-koo? Taaraveai daꞌung dakoꞌkoo beroining-koong kumpikumpiring, enang toroarima karanaang basiarimang. Teinge eeꞌninge napoꞌ daꞌ nkaraavaꞌnaang.” 10 Teketa namuꞌke teni teꞌ doonko kauꞌkanooꞌ booꞌ duaꞌaruꞌ. Eeꞌnoko teinge nemaaꞌke poroma booꞌparioꞌ ooaara oko-aape nkavai berora dakoꞌauꞌ baꞌung-koo nameng-aape. 11 Eeꞌnoko avoꞌavoroꞌ pankaing tavoꞌkuuꞌ teing-koo ookara-koo dootuuꞌnupoong-koo eeꞌnoko napoꞌ teing-koo tang taaravauꞌning-koo.

Kumponinge Teing Karistooꞌ Bakaning Taaꞌniꞌantavuruꞌnaꞌ

12 Enang tee teinge kara okovuri nkanukai mmauꞌ taaꞌniꞌantananka eeꞌnoko taꞌnimpaariiꞌnanka nkoaakoꞌ nantoong-koo meuꞌke, eeꞌnoko teing ookutunavitu dootuuꞌnava pankava-koo Solomoniꞌ bakanavaro aivitu~navaro-koo teke nariꞌ kuneꞌeema otorokoꞌ. 13 Niiꞌning teing-anko poꞌkoo avoreaakoꞌ, teka bane avoreaama nantoonge deto aaꞌnaꞌ nariꞌ noruꞌaarikoꞌ. 14 Eeꞌnoko niiꞌninge masikaꞌantavaama dau-eta dau Ovoring-koo tampoꞌarikoꞌ, miatara, aaꞌnoko donkaang eeꞌnoko manikuꞌ. 15 Teeꞌ nkoarima teinge siipa-poꞌnupoong taung sionairu-koo nkavaari poroma batanang-koo eeꞌnoko taniꞌ dovang-koo bempaarikoꞌ Piitai teke tankinuma tamung uuꞌaaꞌ narunge deekoꞌ, dakaꞌantavuriko taarevorooꞌnaang. 16 Eeꞌnoko napoꞌ nantoonge osi okiꞌnarekaꞌketa Jerusalemaꞌ koroai otoroining-eta siipa-poꞌnupoong poꞌantavaarikoꞌ eeꞌnoko maꞌnari orenge koriaarikoꞌning, eeꞌnoko ookara nariꞌ taarevorokoꞌ.

Koosinunge~ Simpiriꞌantavuruꞌnaꞌ Teing Kara Okovuri Nkanuka

17 Teka piristiꞌ deto basi daaꞌaruꞌnung bakanavitu Noruꞌ Pitunavitu ninka mamairoi maantoꞌuri. 18 Eeꞌnoko teing kara okovuri nkanuka daiꞌaarira kiimatanava-koo tamung sipaarimanooꞌ sipaaruꞌ. 19 Teka muunganang Ovoring bakaang koosinunge karanaang kiimatanava-koong daateꞌura damaꞌdu sing-antavuruꞌ teing, eeꞌnoko aaꞌpuruꞌ, 20 “Berira donkoniriaing teꞌ pava dootuuꞌnava pankava-koo eeꞌnoko nauereriaing nantoong ookara minkunaa aung amuriiꞌ nerakung otootoꞌkoong.” 21 Eeꞌnoko tenang teinge teeꞌ taaravaara taneꞌke tero oraꞌka pava dootuuꞌnava pankava-koo berora nau-antavaarikoꞌ teke.

Enang piristiꞌ deto basi bakanooꞌ kara simpeꞌdoma pouꞌ teing ninka nariꞌ otorokoꞌning ninka, teketa koompaaraꞌnavitu bokuaaruꞌ, teing ookara boreꞌnuka Isireeli-nupoong tarenuka, eeꞌnoko kiimatanava-koo botoaaruꞌ kara okovuri nkanuka poꞌantavaariiꞌnaang. 22 Teka tenang piatooronanka~ porora teka kiimatanava-koo ooaariaꞌ, eeꞌnoko toroarira teeꞌ minkuauꞌ ooaariaruuꞌnaꞌ. 23 Aaꞌpauꞌ, “Niiꞌke kiimatanava tampaꞌ pinkaꞌarioꞌ ooampiring, eeꞌnoko tanatavaamaing karanaange donkonaioꞌ, teka tenang daateꞌampirinang narung naning otoaꞌ kuunge.” 24 Enang tee teie teing piatooronuka dootuuꞌnava pankava tareaakoꞌning-koong boreꞌke eeꞌnoko piristiꞌkoo pankenge taaravaara teing aing karananka teing papaaravariruꞌ teing-koo. Paapaaꞌarima aaꞌpaakoꞌ, “Aiꞌ pa arekeeꞌ nkoaraaꞌnaang?” 25 Eeꞌnoko niiꞌnunge pora aaꞌpuruꞌ, “Teing nantoong diiꞌke kiimatanava-koo siperereruꞌning pava dootuuꞌnava pankava-koo donkonai nau-antavaarimaang nantoong.” 26 Teketa teing piatooronuka biikaang boreꞌ siompai berora bokuaaruꞌ teing, teka tokoonaꞌ nkoaariaꞌ avoreai nantoonge kapange tooꞌpaariꞌneeng-koo.

Tuutunanooꞌka Kara okovuri nkanukai Ovontung Makuꞌaaruꞌnaꞌ

27 Eeꞌnoko teinge poꞌantavaarira koompaaraꞌnavitu-koo uroꞌkanooꞌ donkong-antavaaruꞌ. Bera piristiꞌ deto basie niaꞌurima aaꞌpuuꞌ, 28 “Niiꞌke bakei koontoꞌ poterarampirieeng diiꞌ tee aung miring-koo nau-antarariarooꞌnaang. Teka diiꞌke maantoꞌantavering aung Jerusalemaꞌnameng teie diikaang naunaue, eeꞌnoko diiꞌke niiꞌ tuumpi-koo keiꞌdorimang aung naning bakaang booꞌkoo.”

29 Teka Piitai eeꞌnoko teing niiꞌning kara okovuri nkanukai makuꞌaama aaꞌpauꞌ, “Niiꞌ aaꞌ tee Kumponing-koo narung-koo arooꞌmariiꞌnaang, naning-koo deeaꞌ. 30 Teie Kumponinge niikakatauro biikaange daaꞌantavuuꞌnung tee Jiisuuꞌ diiꞌke dupisiꞌeruꞌnung aaꞌbarataꞌkoo biꞌerira. 31 Kumponinge pankaing-antavuuꞌnung deto tee-koo tampavine-koo sipura nantoong biikaang Ovoring eeꞌnoko Domang-anta deemparaaꞌnaang teketa diiꞌ Isireeli-nupoong pakururioꞌ bereꞌdariko orakaꞌ nkonanka tontaꞌderuriiꞌnaang. 32 Eeꞌnoko niiꞌ teing kara siraꞌnuka aing-koo kapooꞌnanka-koo tee ninka Tanuaang Meekung ninka nariꞌ, tee eeꞌnung Kumponinge avuruꞌnung teing siompaamaing.”

Kamelielei Ovontung Kaꞌduu-antavuruꞌnaꞌ

33 Tenang teinge ovorooꞌnukai teeꞌ taaravaara teing iirai puruꞌantavurioꞌ teing dupisiꞌkoo piavorouꞌnung. 34 Teka teing-koo narung Boto Keperuuꞌnavitu~koong miring Kameliele otokoꞌ ookarai nantoonge tampaꞌ noruꞌaamaung. Bera tee teing-koo koompaaraꞌnavitu-koo meuꞌke donkonura aaꞌpuuꞌ, “Aing nantoong damaꞌdu sing-antaverereriai ioꞌ.” 35 Eeꞌnoko teie aaꞌpuruꞌ teing ovookaꞌnuka, “Diiꞌ Isireeli-nupoong, tampaꞌ tarerariai aing-koo kapooꞌ orara nkoveriꞌneeng. 36 Tero tee naning Tuudas donkonura baka daangamparakoꞌnung pankaing tamparama, eeꞌnoko karingai donkaange deerunooꞌ karenaumo daakuꞌke siompaakoꞌ. Teka tee tavaako tee teing tee siompaakoꞌning avitoitoi purarenkaꞌarira paaꞌariruꞌ. 37 Tee-koo damaꞌke Judasi Kaaleliꞌnung napoꞌ donkonuuꞌ tenang Siisaꞌke nantoong deeruvurikoꞌnang, eeꞌnoko teie niiꞌning barampuruꞌ. Eeꞌnoko tee napoꞌ teeꞌ booꞌparuꞌ eeꞌnoko teing ookara tee siompaakoꞌning purarenkaꞌariruꞌ. 38 Teeꞌkoo ninge enang diiꞌ aung kapooꞌ enang tavoꞌkuing-koo naurampimang, dontaꞌdariri otoriaing aing-eta nantoong-eta, siperereriko biiꞌka otoroai. Aing kapooꞌ ainge maroaama nkoaamatomaing naning-etaing deekoꞌ teing duaꞌaravaining. 39 Teka teing Kumponing-etaing deekoꞌ diiꞌke teing duaꞌanta-koo makosi deeaꞌ. Teeꞌ nkorarima deekoꞌ Kumponing ninka turaniꞌnanka deentariiꞌnaang.”

Teing Kara Okovuri Nkanuka Muraꞌaariko Doturotuariruꞌnaꞌ

40 Bera tee bakaang kara tampaꞌ taaravaara teing kara okovuri nkanuka kuung bokuaarira muraꞌaarima poteaaruꞌ Jiisuuꞌ bakaang miring-koo kapooꞌ minkuaavarooꞌnaang. 41 Teketa tee koompaaraꞌnavitu-ankoita berouꞌnung dotuariritaaꞌ Kumponinge tauraꞌpuruꞌnung-koo mankiꞌ nkavaavaꞌnaang bakaang miring-koo. 42 Eeꞌnoko doong kante pava dootuuꞌnava-koo eeꞌnoko nantoong biikaning pavananka-koo nau-anta-koo sipariarukoꞌ daankiaama Jiisuuꞌ tee naning Kumponinge tero Pakoꞌpariꞌuuꞌnung~ nantoong domampuri tarevuriainooꞌkoo.